Ռուսաստանում արգելվել են Telegram-ի եւ WhatsApp-ի զանգերը

Ռոսկոմնադզորը հաստատել է, որ Ռուսաստանում այժմ սահմանափակվում են Telegram-ի եւ WhatsApp-ի զանգերը: Այս միջոցառումը ներդրվում է խարդախների դեմ պայքարի համար։

«Իրավապահ մարմինների տվյալներով եւ քաղաքացիների բազմաթիվ խնդրանքների համաձայն՝ Telegram եւ WhatsApp արտասահմանյան մեսենջերները դարձել են հիմնական ձայնային ծառայություններ, որոնք օգտագործվում են խաբեության եւ գումարի շորթման, ինչպես նաեւ Ռուսաստանի քաղաքացիներին դիվերսիաների եւ ահաբեկչական գործողությունների մեջ ներգրավելու համար»,- ասվում է Ռոսկոմնադզորի մամուլի հաղորդագրությունում։

Սահմանափակումները ազդել են միայն զանգերի գործառույթի վրա: Հաղորդագրությունների, լուսանկարների եւ տեսանյութերի ուղարկումը, ինչպես նաեւ Telegram-ի եւ WhatsApp-ի այլ գործառույթները կշարունակեն գործել սովորականի պես, հավելել է Ռոսկոմնադզորը։

Ավելի վաղ Forbes-ի եւ RBC-ի աղբյուրները հայտնել էին, որ տելեկոմ օպերատորները՝ MTS-ը, MegaFon-ը, Beeline-ը եւ Tele2-ը, առաջարկել են արգելափակել զանգերը արտասահմանյան մեսենջերներում, սակայն նախաձեռնությունը աջակցություն չի ստացել: Ռոսկոմնադզորը հայտարարել է, որ իրենք տեղյակ չեն նման խնդրանքի մասին։