Հայ հիմնադիրներով DeepSat-ը պայմանագիր է կնքել ԱՄՆ ռազմաօդային ուժերի հետ

DeepSat-ը ձեռք է բերել ԱՄՆ ռազմաօդային ուժերի «Phase II» պայմանագիր՝ զարգացնելու տիեզերքից իրական ժամանակի դիտարկումները։

DeepSat-ի «Օրիոնի գոտի» համաստեղությունը կտրամադրի անընդհատ իրավիճակային իրազեկում ԱՄՆ-ի եւ դաշնակիցների առաքելությունների համար։

Լոս Անջելեսում ստեղծված DeepSat ստարտափը ընտրվել է ԱՄՆ ռազմաօդային ուժերի հետազոտական լաբորատորիայի (AFRL) կողմից՝ ստանալով «Direct to Phase II» պայմանագիր։ 

Սա հնարավորություն է տալիս DeepSat-ին արագորեն մշակել եւ փորձարկել իր արբանյակային համաստեղությունը՝ ապահովելով անընդհատ եւ իրական ժամանակի մոնիթորինգ, լրացնել հրատապ ազգային անվտանգության եւ բնապահպանական բացերը հատկապես Հնդկա-Խաղաղօվկիանոսյան տարածաշրջանում եւ դրանից դուրս։

Հաճախ օվկիանոսները դառնում են ապօրինի գործունեության թատերաբեմ՝ սկսած անօրինական ձկնորսությունից, մաքսանենգությունից եւ մարդկանց առեւտրից մինչեւ չարտոնված ռազմական գործողություններ։ Global Fishing Watch-ի եւ այլ ՀԿ-ների տվյալներով՝ բաց ծովի ձկնորսության ավելի քան 75%-ը մնում է չհետագծված։ 

DeepSat-ի համաստեղությունը, որն աշխատում է VLEO տեխնոլոգիայով եւ ներկառուցված արհեստական բանականությամբ, կօգնի փակել այս բացը՝ ապահովելով նավերի իրական ժամանակի հայտնաբերում եւ օվկիանոսների հեռավոր շրջաններում ավելի հաճախակի դիտարկումներ։

«AFRL-ի կողմից DeepSat-ի ընտրությունը արտացոլում է մարտավարական Երկրի հետախուզության աճող պահանջարկը, որը եւ՛ ճկուն է, եւ՛ մասշտաբային։ Մենք ոգեւորված ենք օգնելու լուծել աշխարհի ամենահրատապ անվտանգության մարտահրավերներից մեկը»,- նշել է DeepSat-ի համահիմնադիր եւ գործադիր տնօրեն Ներսես Օհանյանը։

Ավելի վաղ հայտնել էինք, որ DeepSat-ն իր առաջին ցանցային արբանյակը տիեզերք ուղարկելու նպատակով կհամագործակցի Redwire Corporation ընկերության հետ։