Էլոն Մասկը նախազգուշացրել է՝ Մարս ուղարկվելիք հրթիռը ճանապարհին կարող է պայթել

SpaceX-ի հիմնադիր Էլոն Մասկը նախազգուշացրել է, որ Falcon Heavy հրթիռը, որը նախատեսվում է ուղարկել Մարս, կարող է պայթել գործարկումից անմիջապես հետո:

TechCrunch-ի փոխանցմամբ՝ Միջազգային տիեզերակայան կայանի տեխնոլոգիաներին եւ գործածմանը նվիրված կոնֆերանսի ժամանակ Մասկը նշել է, որ Falcon-ի գործարկման պահին պետք է միաժամանակ աշխատեն բոլոր 27 շարժիչները: Համեմատության համար նշենք, որ Falcon 9 հրթիռն ընդամենը 9 շարժիչ ունի:

«27 շարժիչով հրթիռը շատ ավելի բարդ է, քան ակնկալում էին ընկերության մասնագետները, եւ թիմն այդ աշխատանքը նախաձեռնելիս շատ միամիտ է եղել… Կա շատ մեծ հավանականություն, որ հրթիռը չի հասնի ուղեծիր: Հուսով եմ, այն բավական հեռու կլինի մեկնարկային հրապարակից, որպեսզի դրան վնաս չհասցնի, եւ դա արդեն ես հաղթանակ կհամարեմ»,- ասել է Էլոն Մասկը:  

Նա կատակել է, որ Falcon Heavy-ով թռչող առաջին անձնակազմի անդամները շատ խիզախ մարդիկ պետք է լինեն, իսկ ներկաներին կատակով հրավիրել է դիտել հրթիռի փորձարկումը:

Մասկը նաեւ ասել է, որ առաջիկա 3-4 տարիների ընթացքում ցանկություն ունի թռչել Միջազգային տիեզերական կայան, ինչպես նաեւ խոսել է լուսնի վրա կայան ստեղծելու անհրաժեշտության մասին:

SpaceX-ն արդեն մի քանի անգամ հետաձգել է Falcon Heavy հրթիռով Dragon տիեզերական բեռնատարների առաջին փոխադրումը Մարս: Նախատեսվում է, որ նախնական փորձնական թռիչքը կիրականացվի մինչեւ տարեվերջ: