Mistral AI-ը թողարկել է իր առաջին «պատճառաբանող» մոդելները

Ֆրանսիական Mistral AI-ը թողարկել է իր առաջին «պատճառաբանող» Magistral մոդելները եւ չաթբոտին ավելացրել է «մտածող» ռեժիմ։

Մոդելներից մեկը Magistral Small-ը բաց կոդով է, ունի 24 միլիարդ պարամետր, համատեքստային պատուհանը՝ 128 հազար թոքեն։ «Օպտիմիզացված» տեսքով այն կարող է աշխատել մեկ Nvidia RTX 4090 տեսաքարտի կամ 32 ԳԲ օպերատիվ հիշողությամբ Mac-ի վրա։ Հասանելի է Hugging Face-ում՝ Apache 2.0 լիցենզիայով։ Այն կարող է օգտագործվել առեւտրային նպատակներով։

Mistral AI-ը նաեւ թողարկել է Magistral-ի «ավելի հզոր» տարբերակը՝ Medium-ը։ Նախնական տարբերակը հասանելի է API-ով, Amazon SageMaker ամպային հարթակում։ Ընկերության Le Chat չատբոտում նույնպես ավելացվել է Medium-ը՝ «Reasoning» եւ «Pure Reasoning» կոճակներով։ Մշակողի խոսքով՝ Magistral-ը «հատկապես լավ է մտածում» անգլերեն, ֆրանսերեն, իսպաներեն, գերմաներեն, իտալերեն, արաբերեն, պարզեցված չինարեն եւ ռուսերեն: 

Այն հարմար է ծրագրային ապահովման մշակման, ռազմավարական պլանավորման, ռիսկերի գնահատման, ստեղծագործական գրավոր աշխատանքների, իրավական հետազոտությունների, ֆինանսական կանխատեսումների, օպտիմալացման հաշվարկների համար։

Որոշ մոդելների համեմատություն տարբեր չափանիշներով
photo © Mistral AI

Mistral AI-ը հիմնադրվել է Google DeepMind-ի եւ Meta-ի աշխատակիցների կողմից 2023 թվականին։ Այս ընթացքում Mistral AI-ը 1.14 միլիարդ դոլար է ներգրավել Lightspeed Venture Partners-ից, General Catalyst-ից, Andreessen Horowitz-ից, Nvidia-ից եւ այլ ընկերություններից: 2024 թվականի ամռանը ընկերությունը գնահատվել է 6 միլիարդ դոլար: