Apple-ը եւս $100 մլրդ. կներդնի ԱՄՆ-ում արտադրության մեջ

Apple-ը խոստացել է եւս 100 միլիարդ դոլար ներդնել ԱՄՆ-ում արտադրության մեջ՝ իր սարքերի վրա մաքսատուրքերից խուսափելու համար։

Միեւնույն ժամանակ, ԱՄՆ նախագահ Դոնալդ Թրամփը հայտարարել է չիպերի ներմուծման վրա 100% մաքսատուրքեր մտցնելու ծրագրերի մասին, բայց խոստացել Apple-ին եւ ԱՄՆ-ում ներդրումներ կատարող այլ ընկերություններին ազատել դրանցից։

Apple-ը հայտարարել է, որ նոր ներդրումները կլինեն «Ամերիկյան արտադրական ծրագրի» մի մասը, որի նպատակն է ընդլայնել մատակարարման շղթան եւ արտադրական հզորությունները տեղափոխել ԱՄՆ։ Ընկերության գործընկերների թվում կլինեն ապակու արտադրող Corning-ը, կիսահաղորդիչների մատակարարներ Applied Materials-ը, Texas Instruments-ը եւ այլ կազմակերպություններ։

Մասնավորապես, Corning-ը գործարան կհատկացնի Կենտուկիում iPhone-ի եւ Apple Watch-ի համար պաշտպանիչ ապակու արտադրության համար։ Apple-ը նախագծում կներդնի 2.5 միլիարդ դոլար։ Ապագայում ձեռնարկությունը պետք է արտադրի ամբողջ աշխարհում վաճառվող սարքերի ապակու 100%-ը։

Երբ Քուկը ծրագիրը ներկայացրել է Թրամփին, վերջինս հայտարարել է, որ մտադիր է 100% մաքսատուրքեր սահմանել չիպերի ներմուծման վրա։ Նա նշել է, որ սակագները չեն կիրառվի Apple-ի եւ այլ ընկերությունների նկատմամբ, որոնք ներդրումներ են կատարում ամերիկյան արտադրության մեջ։

2025 թվականի փետրվարին Apple-ը հայտարարել է ԱՄՆ-ում արտադրության մեջ 500 միլիարդ դոլար ներդնելու եւ չորս տարվա ընթացքում 20,000 աշխատատեղ ստեղծելու ծրագրերի մասին։ Ընկերությունը նախատեսում էր Հյուսթոնում գործարան կառուցել՝ Foxconn-ի հետ համատեղ սերվերներ արտադրելու, ինչպես նաեւ մի քանի նահանգներում իր տվյալների կենտրոնների հզորությունը ընդլայնելու համար։

Թրամփի վարչակազմը հույս ուներ, որ Չինաստանի նկատմամբ բարձր սակագները կստիպեն Apple-ին iPhone-ի արտադրությունը տեղափոխել ԱՄՆ։ Սակայն փորձագետների մեծ մասը նշել է, որ ընկերությունը, հավանաբար, դա չի անի մոտ ապագայում՝ մատակարարների, հզորությունների եւ աշխատուժի պակասի պատճառով։ Դրա փոխարեն Apple-ը կենտրոնացել է Հնդկաստանում գործարաններ զարգացնելու վրա։