ԱՄՆ-ում DeepSeek-ը կարող է արգելվել

ԱՄՆ նախագահ Դոնալդ Թրամփի վարչակազմը դիտարկում է նոր սահմանափակումներ կիրառել չինական AI լաբորատորիա DeepSeek-ի նկատմամբ։

Կսահմանափակվի Nvidia-ից AI չիպերը գնելու հնարավորությունը եւ հնարավոր է նաեւ արգելեն ամերիկացիներին օգտվել դրա AI ծառայություններից, գրում է The New York Times-ը։

Այս սահմանափակումները Թրամփի վարչակազմի ջանքերի մի մասն են՝ Չինաստանի հետ արհեստական բանականության ոլորտում մրցակցելու ուղղությամբ։ Երբ DeepSeek-ը ցնցեց ինչպես Սիլիկոնյան հովիտը, այնպես էլ Ուոլ Սթրիթը, ԱՄՆ պաշտոնյաները, կարծես թե, քննարկում են մի քանի տարբերակ՝ սահմանափակելու Չինաստանի հասանելիությունը ամերիկյան տեխնոլոգիաներին եւ սպառողներին։

Սպիտակ տունը ձեռնարկել է նոր քայլեր՝ ավելի սահմանափակելու Nvidia-ի AI չիպերի վաճառքը Չինաստանին։

Վերջին ամիսներին DeepSeek-ի հայտնիությունը ԱՄՆ-ի AI մշակողների շրջանում կտրուկ աճել է, եւ այդ ստարտափի մրցունակ գնային քաղաքականությունը ստիպել է Սիլիկոնյան հովտի խոշոր խաղացողներին առաջարկել իրենց առաջատար մոդելներն ավելի ցածր արժեքներով։