Ծաղկաձորում մեկնարկել է Ուսանողական հաքաթոնը

Օգոստոսի 26-ին ՀՀ բարձր տեխնոլոգիական արդյունաբերության նախարար Մխիթար Հայրապետյանը Ծաղկաձորում մասնակցել է Ուսանողական հաքաթոնի պաշտոնական բացմանը: 

Հաքաթոնը կանցկացվի օգոստոսի 26-29-ը՝ Հայաստանի տարբեր կրթական հաստատությունների շուրջ 100 ուսանողի մասնակցությամբ։

«Հաքաթոնները կարեւոր հարթակ են, որտեղ մասնակիցները, կարճ ժամանակում համագործակցելով, տեսական գիտելիքը վերածում են նորարարական ու գործնական լուծումների՝ տալով տեսանելի թիմային արդյունք եւ արժեքավոր փորձ։ Մենք հաքաթոնները չենք դիտարկում լոկ որպես մրցույթ, այն հնարավորություն է ստեղծագործելու, առաջին հայացքից անլուծելի թվացող խնդիրներին որակյալ լուծումներ տալու, նոր գիտելիքներ կուտակելու», – նշել է Մխիթար Հայրապետյանը։

Մասնակիցներին կտրվեն առաջադրանքներ երեք թեմայի շուրջ՝ տարերային աղետներ կանխատեսող եւ կառավարող տեխնոլոգիաներ, պատկերների թվային մշակման տեխնոլոգիաներ եւ տեխնոլոգիական խելացի լուծումներ քաղաքաշինության մեջ:

Միջոցառման ընթացքում թիմերը կառաջարկեն տարբեր լուծումներ տեխնոլոգիական ոլորտին առնչվող բազմաբնույթ խնդիրների վերաբերյալ: Լավագույն լուծումներ առաջարկած 3 թիմերը կստանան դրամական մրցանակներ` 2.5, 1.5, 1 մլն ՀՀ դրամի չափով:

Հաքաթոնի ընթացքում կանցկացվեն նաեւ մասնագիտական սեմինարներ եւ քննարկումներ ԲՏԱ նախարարության, բիզնեսի, ստարտափների, ուսանողների, ինչպես նաեւ գիտական եւ կրթական կազմակերպությունների ներկայացուցիչների մասնակցությամբ: