Techstars-ի մենթորի խորհուրդները հայկական ստարտափներին

Փետրվարի 9-10-ը Լատվիայի մայրաքաղաք Ռիգայում կայացել է TechChill տեխնոլոգիական միջոցառումը, որը 26 երկրից հյուրընկալել է 1000-ից ավելի ներդրողների, ստարտափների հիմնադիրների, ձեռներեցների եւ էկոհամակարգի այլ ներկայացուցիչների:

Ֆիլ Գիխարոն աշխարհում ամենահայտնի ստարտափ աքսելերատորներից մեկի՝ Techstars-ի, ինչպես նաեւ Startupbootcamp աքսելերատորների գլոբալ ցանցի մենթորներից է: Ավելի քան 10 տարի է, մենթորն աշխատում է Բեռլինում եւ աջակցում հաջողակ ստարտափներին՝ բազմազգ վաճառքի թիմեր ձեռք բերելու եւ վաճառքի պրոցեսը հավուր պատշաճի իրականացնելու հարցում:

Itel.am-ի թղթակիցը ներկա է եղել TechChill-ին եւ զրուցել Ֆիլ Գիխարոյի հետ:

- Որքանո՞վ եք ծանոթ հայկական ստարտափ էկոհամակարգին:

- Դժբախտաբար, բացարձակ ծանոթ չեմ հայկական ՏՏ էկոհամակարգին: Ներկայում, որքանով որ տեղյակ եմ, Techstars-ում հայկական ստարտափներ ներառված չեն, սակայն համոզված եմ, որ անցյալում եղել են, եւ անշուշտ կլինեն նաեւ ապագայում: Ես՝ որպես մենթոր, աշխատել եմ 10-ից ավելի երկրում եւ հետաքրքրված եմ Հայաստան այցով:

- Ի՞նչ պետք է հաշվի առնեն ստարտափները Techstars-ին կամ այլ աքսելերացիոն ծրագրերին դիմելիս:

- Ընդհանուր առմամբ, աքսելերատորների համար որոշում կայացնելը շատ բարդ է, քանի որ նրանք պետք է ընտրեն միայն 8-10 ստարտափի: Խոսելով ոչ թե Techstars-ի, այլ իմ անունից՝ կարող եմ ասել, որ դիմելիս պետք է պատրաստ լինել նրան, որ մրցելու են հարյուրավոր ստարտափների հետ, եւ արդյունքում միայն մի քանիսն են ընտրվելու: Ընտրությունը շատ բարդ է, բազմաթիվ հիանալի ստարտափներ, տեղերի սահմանափակ լինելու պատճառով, չեն ընտրվում, եւ եթե դուք չընտրված ստարտափների թվում եք, շարունակե՛ք դիմել տարբեր ծրագրերի:

photo © Edijs Palens

- Լինելով մարքեթինգի եւ վաճառքների մասնագետ` ի՞նչ խորհուրդ կտաք հայկական նորաստեղծ ընկերություններին:

- Խորհուրդս մեկն է՝ լրջորեն վերաբերվել պրոդուկտի վաճառքի գործընթացին: Իհարկե, կարող եք մտածել, որ դուք լավագույնն եք եւ նստել, սպասել նրան, որ հաճախորդներն իրենք ձեզ գտնեն: Սակայն ավելի լավ է գործընթացն այնպես կազմակերպել, որ վստահ լինեք՝ ամեն շաբաթ հանդիպելու եք այսքան թվով պոտենցիալ հաճախորդների:

- Հետաքրքիր է, գերմանական ստարտափների հիմնական թիրախը լոկա՞լ, թե՞ գլոբալ շուկան է:  

- Գերմանական ստարտափների մեծ մասը նայում է դեպի գլոբալ շուկաներ եւ երբեմն դա անում է գործընթացի ամենասկզբից:Մյուս կողմից՝ գերմանացի պոտենցիալ հաճախորդները բաց են արտաքին շուկաների հանդեպ: Ժամանակակից ինդուստրիայում գոյություն ունի մեծ չափով ազգայնականություն, եւ օրինակ գերմանացիները սովորաբար ցանկանում են աշխատել գերմանական ստարտափների հետ, ֆրանսիացիները՝ ֆրանսիական, եւ այլն:

Ես բազմաթիվ ստարտափների հետ եմ աշխատել, որտեղ մենք պետք է հաճախորդներ գտնեինք այլ երկրներից, եւ ինչպես ցանկացած վաճառքի պրոցեսում, անհրաժեշտ է կարողություն՝ լսելու առարկությունները: Հաճախ ասում են, օհ, դուք Գերմանիայում եք գործունեություն ծավալում, ժամային տարբեր գոտիներ են, լեզվական տարբերություններ: Պետք է կարողանալ այդ բոլոր առարկություններին խելամիտ պատասխաններ գտնել: Եթե կարծում եք, որ դա ձեր ուժերի սահմանում է, ապա արժե հաղթահարել մշակութային, լեզվական, ժամանակային խոչընդոտները: Շատ ստարտափներ են այդպես վարվել անցյալում եւ շարունակելու են այդպես անել ապագայում:

Ֆիլ Գիխարրոյի հետ զրուցել է Նարինե Դանեղյանը

TechChill-ի կազմակերպիչը TechHub Riga-ն է, գլխավոր հովանավորներն են ALTUM, TWINO եւ Printful ընկերությունները: