Օպերատորները մեկնաբանում են Mobile ID համակարգի ներդրումը

Ինչպես արդեն տեղեկացրել ենք, հոկտեմբերի 1-ից Հայաստանի քաղաքացիները հնարավորություն կունենան նույնականացվել բջջային հեռախոսի միջոցով, ինչը թույլ կտա առանց տանից դուրս գալու եւ նույնականացման քարտի կիրառման, պետական կառույցների հետ անհրաժեշտ գործարքներ կատարել էլեկտրոնային եղանակով:

«Շարքային քաղաքացին, այդ համակարգից օգտվելու համար պետք է դիմի իրեն սպասարկող բջջային օպերատորին, որպեսզի ակտիվացնի տվյալ ծառայությունը: Դրա համար օպերատորը փոխարինելու է դիմողի SIM քարտըˋ պահպանելով նրա հեռախոսահամարը: Ենթադրվում է, որ ծառայության ակտիվացման պահից քաղաքացին ամեն ամիս որոշակի գումար է վճարելու իր օպերատորին, որը պայմանական, կարող է լինել մինչեւ հինգ հարյուր դրամի սահմանում, լրացուցիչ այլ ծախսեր համակարգը չի ենթադրում»,- նշել էր Էլեկտրոնային ենթակառուցվածքների ներդրման գրասենյակի գործադիր տնօրեն Արթուր Թունյանը:
 
Հարցի առնչությամբ Itel.am-ը դիմել է հեռահաղորդակցության հայաստանյան օպերատորներին եւ ներկայացնում է նրանց մեկնաբանությունը:

Beeline

Beeline-ը միշտ բաց է նորարարական մոտեցումների ու լուծումների համար եւ ձգտում է տրամադրել իր բաժանորդներին առաջադեմ ծառայություններ: Ներկա պահին ընկերությունում ընթանում են բանակցություններ այդ հարցի առնչությամբ:

Հստակ տեղեկություն ծառայության գործարկման ժամկետների եւ արժեքի մասին կկարողանանք տրամադրել ծառայության մեկնարկից առաջ: Այժմ կարող ենք վստահեցնել, որ արվելու է ամեն հնարավոր բան, որպեսզի այս ծառայությունը առավել մատչելի, պարզ եւ հարմար լինի մեր բաժանորդների համար:

ՎիվաՍել-ՄՏՍ

Հաշվի առնելով այն հանգամանքը, որ Mobile ID համակարգի ներդրման հետ կապված ընթացակարգերը շահագրգիռ կողմերի միջեւ դեռեւս համաձայնեցված չեն՝ ՎիվաՍել-ՄՏՍ-ի դիրքորոշման վերաբերյալ տեղեկատվության տրամադրումը ներկայումս հնարավոր չէ: Mobile ID ծառայության սակագները եւս օպերատորների հետ դեռեւս չեն համաձայնեցվել:

Ucom

ՀՀ կառավարության կողմից ընդունված նշյալ որոշումը Ucom ընկերության կողմից դիտարկվում է որպես եւս մեկ նորարարություն եւ համահունչ է մեր ընկերության՝ նորարար լուծումներով հանդես գալու ռազմավարությանը: Արդյունքում մեր բաժանորդները ստանում են նույնականացման հետ կապված խնդրի լուծման եւս մեկ տարբերակ, որը հարմարավետ է եւ օգնում է ժամանակ խնայել:

Քանի որ որոշումը բոլորովին վերջերս է կայացվել եւ գործընթացը սկսելու համար հարկավոր է մի շարք նախապատրաստական աշխատանքներ իրականացնել (նոր սերնդի SIM-քարտերի ձեռքբերում, դրանցում ծրագրային հավելվածի տեղադրում եւ այլն), այս պահին չենք կարող հստակ նշել ծառայության դիմաց գանձվող ամսավճարի սահմանաչափը: